श्रेष्ठले राजीनामा दिएपछि प्रेस काउन्सिल कार्यवाहक अध्यक्षमा बुढाथोकी

काठमाडौँ ,असोज ९
प्रेस काउन्सिल नेपालका कार्यवाहक अध्यक्ष किशोर श्रेष्ठले पदबाट राजीनामा दिएका छन् भने उनको ठाउँमा गोपाल बुढाथोकी चयन भएका छन् ।

आज शुक्रबार श्रेष्ठले पदबाट राजीनामा दिएपछि बोर्ड बैठकले बुढाथोकीलाई अध्यक्ष चयन गरेको हो । प्रेस काउन्सिल ऐन, २०४८ बैठक सञ्चालनसम्बन्धी, २०७१, सर्वोच्च अदालतको आदेश र विगतका नजीरसमेतको आधारमा कार्यवाहक अध्यक्षमा बुढाथोकीलाई चयन गरिएको जानकारी दिइएको छ ।

साँघु साप्ताहिकका सम्पादक बुढाथोकीलाई सरकारले २०७५ साल साउनमा सदस्यमा नियुक्त गरेको थियो । बुढाथोकीले आजै पदभार ग्रहण गरेका छन् । काउन्सिलको एक कार्यकाल ४ वर्षको हुने व्यवस्था छ ।

कार्यवाहक अध्यक्ष पदबाट राजीनामा दिएपनि श्रेष्ठ काउन्सिल सदस्यको पदमा भने यथावत् रहने छन् । श्रेष्ठको पदावधि यही असोज १२ गते सकिँदैछ । सदस्य र कार्यवाहक अध्यक्षका रूपमा भूमिका निर्वाह गरेको अवधि कठिनपूर्ण रहेको श्रेष्ठले राजीनामा पत्रमा उल्लेख गरेका छन् ।