युइएफए सुपर कपको फाइनल खेलमा २० हजार दर्शक उपस्थित

काठमाडौं,असोज १०
हंगेरीको बुढापेस्टमा बिहीबार राति सम्पन्न युइएफए सुपर कपको फाइनल खेलमा २० हजार दर्शक उपस्थित थिए । उपाधिका लागि स्पेनिस क्लब सेभिल्ला र जर्मन क्लब बायर्न म्युनिखले प्रतिस्पर्धा गरेका थिए । खेलमा बायर्नले २–१ ले बाजी मार्दै उपाधि जित्यो ।

बायर्नले उपाधि जित्नुभन्दा पनि यस फाइनल खेलको ठूलो समाचार बन्यो, पुस्कास रंगशालामा उपस्थित २० हजार दर्शक । पछिल्लो समय हंगेरी युरोपकै कोरोना भाइरसको हट स्पट बनिरहेको छ ।

धेरैजसो मिडियाले यसलाई ‘मानवीय बम’ भनेका छन् । आयोजकले व्यापक चेतावनी दिँदा पनि सेभिल्ला र बायर्नका समर्थक बुढापेस्टमा फाइनल हेर्न पुगेका थिए । आयोजकले दर्शकलाई सामाजिक दूरी कायम गर्न भनेको थियो । दर्शकले आयोजकको आग्रह सुनेनन् । दर्शकले देखाउनका लागि हल्का सामाजिक दूरी राखी सिटमा बसेका थिए । कोरोना भाइरस महामारी रहेको स्थानमा दर्शकको उपस्थितिले संक्रमित फैलाउन सक्ने अनुमान गरिएको छ ।

रंगशालामा बायर्नका भन्दा सेभिल्लाका दर्शकको उपस्थिति धेरै थियो । सेभिल्लाका समर्थक बस रिजर्भ गरी बुढापेस्ट पुगेका थिए । बायर्नका समर्थकले तीनमध्ये एक खण्ड टिकट हात पारे । बायर्नले पनि बुढापेस्टमा आफ्नो टोलीलाई समर्थन गर्नु भनेको मानवीय बम हुन सक्ने भनी सूचना जारी गरेको थियो । रंगशालामा दुई क्लबका मात्र नभएर स्थानीय समर्थक रहन सक्ने भएकाले नै संक्रमित हुन सक्ने जनाइएको छ ।

बाभरियाका मन्त्री माकुस सोडेरले सुपर कपमा समर्थकको उपस्थितिले आफू स्तब्ध भएको प्रतिक्रिया दिएका छन् । ‘बुढापेस्ट पछिल्लो समय निकै रिस्क क्षेत्रमा पर्छ । यहाँ संक्रमित हुने सम्भावना धेरै छ । यस्तो अवस्थामा रंगशालामा समर्थन गर्न जानु भनेको मूर्खता हो,’ सोडेरले खेलअघि समर्थकलाई आग्रह गरे । पछिल्लो डाटाअनुसार रंगशालामा उपस्थित भएका ६ हजार संक्रमित भएको अनुमान गरिएको छ ।

हंगेरीले पुस्कास रंशगालामा दर्शकको उपस्थितिबारे केही प्रतिक्रिया दिएको छैन । आयोजक सहरका मेयर जर्जली कारास्कोनीले सुरुमा बन्द रंगशालाभित्र फाइनल खेलाउने योजना भएको बताएका छन् । एकाएक हजारौँ दर्शक रंगाशालामा कसरी छिरे, आफूलाई जानकारी नभएको उनको भनाइ छ । बुढापेस्ट पुगेका दर्शकलाई शनिबार कोरोना परीक्षण गर्न जर्मन सरकारले भनेको छ । ‘प्रतियोगिता हेरेका सबै दर्शकले कोरोना अनिवार्य रूपमा टेस्ट गराउनुपर्छ,’ आरटिएलले भन्यो । यता, सेभिल्लाले समर्थकलाई कोरोना परीक्षण गर्न भनेको छ । रंगशालाभित्र प्रवेश गर्नुअघि एलिजान एरिनामा कोरोना परीक्षण भएको थियो । एजेन्सी