मंगलबार थपिए १,५५१ संक्रमित, उपत्यकाका मात्रै १०१७ जनामा संक्रमण पुष्टि

काठमाडौं,असोज २०

पछिल्लो २४ घण्टामा देशभर एक हजार ५५१ संक्रमित थपिएका छन् । ११ हजार ४७ जनाको पीसीआर परीक्षण भएकोमा एक हजार ५५१ जनाको रिपोर्ट पोजेटिभ आएको स्वास्थ्य मन्त्रालयका प्रवक्ता डा. जागेश्वर गौतमले बताए ।

मंगलबार थपिएका संक्रमितमध्ये काठमाडौं उपत्यकाका एक हजार १७ जना रहेका छन् । काठमाडौंमा ७८३, भक्तपुरमा ११६ र ललितपुरमा ११८ संक्रमित थपिएका हुन् । बाँकी संक्रमित अन्य जिल्लाका छन् ।

प्रवक्ता गौतमका अनुसार क्वारेन्टिनमा ४ हजार २२१ जना रहेका छन् । सक्रिय संक्रमित संख्या २२ हजार ७०९ रहेको छ । पछिल्लो २४ घण्टामा मात्रै २ हजार ३४० जना डिस्चार्ज भएका छन् । आइसीयूमा २४३ र भेन्टिलेटरमा ४० संक्रमित छन् ।