गाँजा खाने विषयमा विवाद हुँदा साथीको हत्या, एक पक्राउ

काठमाडौं,असोज २९

२२ वर्षीय अभिषेक चौधरीको हत्या गरेको अभियोगमा पक्राउ परेका एक जनालाई प्रहरीले सार्वजनिक गरेको छ। जिल्ला प्रहरी कार्यालय झापाले चौधरीको हत्याको अभियोगमा कनकाई नगरपालिका वडा नम्बर ७ काब्रोटे टोलमा बस्ने २२ वर्षीय टल्के भन्ने रविन राजवंशीलाई बुधबार नियन्त्रणमा लिएको हो । बिहीबार प्रहरीले अभिुक्तलाई सार्वजनिक गरेको हो ।

पक्राउ परेका युवकले गाँजाको विषयमा झगडा हुँदा हत्या गरेको प्रहरी अनुसन्धानमा खुलेको छ । प्रहरीका अनुसार हत्या भएको दिन अभिषेकले १ सय रुपैयाँ दिएर रविनलाई गाँजा किन्न पठाएका थिए । रविनले गाँजा किनेर ल्याए तर अभिषेकले खान दिएनन् । त्यसपछि उनीहरूबीच विवाद भएको थियो ।

त्यही क्रममा अभिषेकले झापड समेत हानेपछि रविनले आफूलाई अपमान गरेको महशुस गरी आफ्नो घरमा गएर बन्चरो ल्याएर बाटो ढुकेर मंगलबार हत्या गरेर भागेको खुलेको प्रहरीले जनाएको छ ।

मृतक अभिषेकको शव कनकाई नगरपालिका वडा नम्बर ३ एकान्त टोलमा रहेको सुरुङ्गा खोलाको बाँध र बासघारी झ्याङ बीचमा भएको भित्री सानो गोरेटो बाटोमा घटनाको भोलिपल्ट स्थानीयले देखेपछि प्रहरीलाई खबर गरेका थिए ।

घटनाबारे थप अनुसन्धान भइरहेको प्रहरीले जनाएको छ ।