बाढी पहिरोको क्षति अवलोकन गर्न प्रधानमन्त्री देउवा सुदूरपश्चिम भ्रमणमा

काठमाडौं । प्रधानमन्त्री शेरबहादुर देउवा अविरल वर्षापछि आएको बाढी र पहिरोका पीडितलाई भेट्न आज गृहप्रदेश सुदूरपश्चिम जाँदैछन् । उनीसँगै पर्यटनमन्त्री प्रेम आले पनि हुनेछन् ।

विपद् जोखिम न्यूनीकरण तथा व्यवस्थापन राष्ट्रिय परिषद्का अध्यक्षसमेत रहेका प्रधानमन्त्री देउवाले स्थलगत निरीक्षणका क्रममा बाढी पहिरोले पुर्‍याएको क्षति, प्रभावित जनजीवनको अवस्था, उद्धार र राहतमा भइरहेका गतिविधिका बारेमा जानकारी लिने उनको निजी सचिवालयले जनाएको छ।

प्रधानमन्त्री देउवासहितको टोली अहिले बिहान काठमाडौंबाट सुर्खेतका लागि उडेको छ । प्रधानमन्त्रीसहितकाे टाेलीले डाेटी, बझाङ, बैतडी, डडेल्धुरा र कञ्चनपुरमा बाढीपहिराे तथा डुबान प्रभावित क्षेत्रकाे हवाइ निरीक्षण गर्ने कार्यक्रम छ ।