इङ्लिस प्रिमियर लिग:सिटीको जितमा फोडान नायक

काठमाडौं । फिल फोडानको उत्कृष्ट प्रदर्शनप्रेरित म्यानचेस्टर सिटीले गएराति इङ्लिस प्रिमियर लिगमा ब्राइटनलाई ४–१ ले हराएको छ ।

शनिबार राति भएको खेलमा सिटीले ब्राइटनलाई ४-१ ले पराजित गरेको हो । जितपछि सिटी दोस्रो स्थानमा समेत उक्लेको छ । सिटीले इल्के गुन्डोगनको गोलबाट १३औं मिनेटमा अग्रता लिएको थियो। २८औं मिनेटमा फोडानले सिटीको अग्रता दोब्बर बनाए । ३१औं मिनेटमा फोडानले अर्को गोल थपे ।

८१औं मिनेटमा एलेक्सिस म्याक एलिस्टरले गरेको गोलबाट ब्राइटनले पुनरागमनको प्रयास गरे पनि सफल हुन सकेन । इन्जुरी समयमा फोडानको पासमा रियाद माहरेजले अर्को गोल थपेपछि सिटीले महत्त्वपूर्ण तीन अंक पक्का गरेको हो । 

जितपछि सिटी ९ खेलबाट २० अंक जोड्दै दोस्रो स्थानमा उक्लेको छ । शीर्ष स्थानको चेल्सीको २२ अंक छ ।ब्राइटन समान खेलबाट १५ अंकसहित चौथो स्थानमा छ ।