बढ्दै सेयर बजार,तीन दिनमा करिब २ सय अंंकले बढ्यो

काठमाडौं । लगातार तेस्रो कारोबार दिन पनि सेयर बजारमा हरियाली छाएको छ । साताको तेस्रो कारोबार दिन मंगलबार सेयर बजार परिसूचक नेप्से ७८.८२ अंकले वृद्धि हुँदा २७५१.०७ अंकमा बन्द भएको छ ।

मंगलबार नेप्सेसँगै कारोबार रकम पनि बढेको छ । आज नेप्सेमा २२७ कम्पनीको ११ करोड चार लाख ८६ हजार १२३ कित्ता सेयर किनबेच हुँदा कुल ६ अर्ब ३१ करोड ८३ लाख बराबरको कारोबार भएको छ । सोमबार चार अर्ब ३० करोड ८८ लाख बराबरको कारोबार भएको थियो ।

एकोहोरो बढ्ने वा घट्ने मात्र हुँदैन । जोखिम बहन क्षमता, होल्ड गर्न सक्ने अवधिलाई पनि ख्याल गर्न विज्ञहरुले सुझाव दिने गरेका छन् । अहिले लाभांशको सिजन चलिरहेको छ । कम्पनीहरुले धमाधम लाभांश प्रस्ताव गरी बुक क्लोज मितिसमेत तय गरिरहेका छन् । कतिपयको साधारण सभाको मिति समेत तय भएको छ ।

आज कारोबार भएका कम्पनीमध्ये सात कम्पनीको सेयर मूल्य १० प्रतिशतले बढेको छ । त्यस्तै, १३ कम्पनीको सेयर मूल्य नौ प्रतिशत भन्दा बढीले बढेको छ भने दुई कम्पनीको सेयर मूल्य आठ प्रतिशतभन्दा बढीले उकालो लागेको छ ।

नेप्सेका अनुसार आज माउन्टेन हाइड्रो नेपालका लगानीकर्ताहरुले सर्वाधिक कमाएका छन् । कम्पनीको सेयर मूल्य १० प्रतिशतले बढेको छ ।