चण्देश्वर श्रेष्ठले भने-प्रधानन्यायाधीशलाई एक मिनेट पनि पदमा बस्ने अधिकार छैन

काठमाडौं । नेपाल बार एसोसिएसनका अध्यक्ष चण्देश्वर श्रेष्ठले प्रधानन्यायाधीश चोलेन्द्रशमशेर जबरालाई एक छिन पनि पदमा बस्ने अधिकार नभएको बताएका छन् ।

 श्रेष्ठले तत्काल राजीनामा दिन प्रधानन्यायाधीश चोलेन्द्र शमशेर राणालाई आग्रह गरेका छन् । उनले देशभरका कानुन व्यवसायी र जनता सडकमा उत्रिए सहज बहिर्गमन नहुने चेतावनी पनि प्रधानन्यायाधीश राणालाई दिए ।

‘देशभरका कानुन व्यवसायी र आमजनता सडकमा उत्रिए भने सहज बहिर्गमन हुन्छ कि राजीनामा दिएर जाँदा,’ उनले प्रश्न गर्दै भने, ‘भोलि महाअभियोग लगाएर निक्लिनु सहज र सम्मानजनक बहिर्गमन हुन्छ कि राजीनामा दिएर अहिले जाँदा आफैँ सोच्नुस् ।’

अध्यक्ष श्रेष्ठले प्रधानन्यायाधीश राणाले न्यायपालिकालाई नै सिध्याउने खेलमा लागेको बताए । ‘न्यायपालिकालाई सिध्याउने खेल भएको छ । यसमा तपाईंको ठूलो हात छ,’उनले भने, ‘त्यसैले तुरुन्तै राजीनामा दिनुस् ।’