वरिष्ठ अधिवक्ता शम्भु थापाले भने-मूल ढोकाबाट छिर्न नसक्ने व्यक्ति कसरी प्रधानन्यायाधीश हुनसक्छ

काठमाडौं । वरिष्ठ अधिवक्ता शम्भु थापाले प्रधानन्यायाधीश चोलेन्द्र शमशेर राणाको बहिर्गमन भइसकेको दाबी गरेका छन्।

शुक्रबार सर्वोच्च परिसरमा आयोजित विरोध कार्यक्रमलाई सम्बोधन गर्दै वरिष्ठ अधिवक्ता थापाले प्रधानन्यायाधीश जबराको बहिर्गमन निश्चित भएको तर कुन हालतमा हुन्छ भन्ने मात्रै बाँकी रहेको बताएका हुन् । 

थापाले सर्वोच्चको मूल ढोकाबाट छिर्न नसक्ने व्यक्ति कसरी प्रधानन्यायाधीश हुनसक्छ भन्दै प्रश्न गरे।

वरिष्ठ अधिवक्ता थापाले महाभारतमा द्रौपतीको जस्तै न्यायको चिरहरण प्रधानन्यायाधीश जबराले गरिरहेको पनि आरोप लगाए । 

‘नेपाल बारले भनिसकेपछि तपाईँको बहिर्गमन भइसकेको छ। प्रहरी र सैनिकको चारैतिर घेरा हालेर अदालत प्रवेश गरेर तपाईँले सेवाग्राहीलाई न्याय दिन नसक्ने हुँदा तपाईँ आउनुको केही अर्थ छैन’, उनले भने, ‘आज जनताको आस्था र विश्वास भएको अदालतमा सवत्र प्रहरी राखेर प्रवेश गर्नुहुन्छ। तपाईँ  मूल गेटबाट प्रवेश गर्नुहुन्न भने तपाईँ पनि प्रधानन्यायाधीश हो र?’