माधव नेपालले भने-प्रधानन्यायाधीश विवाद प्रकरण समाधान गर्न प्रधानमन्त्रीले पहल गर्नुहुन्छ

काठमाडौं । नेकपा एकीकृत समाजवादीका अध्यक्ष माधव कुमार नेपालले प्रधानन्यायाधीश विवाद प्रकरण समाधान गर्न प्रधानमन्त्री शेरबहादुर देउवाले पहल गर्ने बताएका छन् ।

नेकपा एस सुदूरपश्चिम कार्यालयको उद्घाटनका लागि धनगढी पुगेका नेपालले पत्रकारसँगको जिज्ञासामा साझा धारणा बनाएर राम्रो वातावरणमा छिटो समाधान हुनुपर्ने बताए ।

गठबन्धनमा पनि यसबारे छलफल भएको भन्दै नेता नेपालले भने, ‘यसबारे सबै पक्षको ध्यानाकर्षण गराउने निर्णय भएको छ र प्रधानमन्त्रीले यसको निम्ति आफ्नो हैसियतबाट पनि पहल गर्नुपर्छ ।’

एमालेमा रहँदा कञ्चनपुरको पहिलो पार्टी कार्यालय पनि आफैँले उद्घाटन गरेको बताउँदै उनले समाजवादीको जिल्ला पार्टी कार्यालय स्थापनाको क्रम पनि सुदूरपश्चिमबाटै सुरु भएको बताए ।