नेता रामचन्द्र पौडेललाई नेता कृष्णप्रसाद सिटौलाले सहकार्यका आधार पेस गर्न आग्रह

काठमाडौं । संस्थापनइतर समूहबाट सभापतिको साझा उम्मेदवार तय गर्न प्रयास भइरहेका बेला कांग्रेस वरिष्ठ नेता रामचन्द्र पौडेलले तेस्रो धारका नेता कृष्णप्रसाद सिटौलासँग छलफल गरेका छन्।

नेता रामचन्द्र पौडेललाई नेता कृष्णप्रसाद सिटौलाले सहकार्यका आधार पेस गर्न आग्रह गरेका छन् । आफूलाई भेट्न पुगेका पौडेलले सहकार्यको प्रस्ताव गरेपछि उनले आधार प्रस्तुत गर्न भनेका हुन् ।

छोटो भेटमा सिटौलाले आफू छलफलमै रहेको भन्दै पौडेलको प्रस्तावमाथि थप जवाफ नदिएको एक नेताले बताए । दुवै पक्षले भेटलाई गोप्य राख्न खोजेका छन् । पछिल्लो समय प्रदेश र जिल्ला अधिवेशनमा देउवा र सिटौला पक्षबीच गठबन्धन भएको थियो ।

‘हिजो देउवाविरुद्ध हामी सँगै लडेका हौँ । तपाइँले देउवालाई सहयोग गर्दा नैतिक प्रश्न खेप्दै आउनुभएको छ । अहिले त्यो कुरा सुधार गर्न र पार्टीलाई सुदृढ बनाउने मौका छ । हामी वैचारिक हिसाबले सधैँ एकठाउँमा छौँ । यो पटक मिलेर जाऔँ,’ नेता पौडेलको प्रस्ताव थियो ।