पुस १७ गतेदेखि बूढानीलकण्ठमा रेस्लिङ प्रतियोगिता

काठमाडौं । पहिलो संस्करणको आरडब्लु विन्टर स्लाम २०२१ पुष १७ गतेबाट हुने भएको छ।

बूढानीलकण्ठ नगरपालिका- १३ र नेपाल रिङ रेस्लिङ संघको संयुक्त आयोजनामा शनिबारदेखि बूढानीलकण्ठस्थित चुन्निखेल मैदानमा प्रतिष्ठित रेस्लरहरूसहित प्रतियोगिता आयोजना हुने नेपाल रिङ रेस्लिङ संघले जनाएको छ ।

प्रतियोगितामा नुवाकोटे टाइगर, चटान, डेभिड, साईन, टुप्पी ग्याङ, एक्स हिरो, लेडी एञ्जल, तन्नु, किङ रोबोट, सिजे, एससी, जोन, बाका, यूबीएल लगायत महिला तथा पुरुष खेलाडीहरुले प्रतिस्पर्धा गर्ने नेपाल रिङ रेस्लिङ संघका महासचिव सुवर्ण श्रेष्ठले जानकारी दिइन्।

प्रतियोगितामा हेभी वेट च्याम्पियनले ७५ हजार, हार्डकोर च्याम्पियनले ६५ हजार, मिडल वेट च्याम्पियनले ५० हजार, ट्याग टिम च्याम्पियनले ४० हजार, लाइट वेट च्याम्पियनले ३५ हजार रुपैयाँ पाउनेछन्। बूढानीलकण्ठस्थित चुन्निखेल मैदानमा हुने प्रतियोगिता सम्पन्न गर्न करिब १५ लाख रुपैयाँ खर्च हुनेछ।