पाकिस्तानविरुद्धको पहिलो टी-२० मा इंग्ल्याण्ड विजयी

एजेन्सी, घरेलु टोली पाकिस्तानविरुद्धको टी–२० सिरिजअन्तर्गत पहिलो खेलमा इंग्ल्याण्ड विजयी भएको छ । ऊ गएराति सम्पन्न खेलमा ६ विकेटले विजयी भएको हो ।

पाकिस्तानले दिएको १ सय ५९ रनको लक्ष्य इंग्ल्याण्डले चार बल बाँकी छँदा चार विकेट गुमाएर भेट्टायो । उसका लागि एलेक्स हेल्सले ४० बलमा सात चौकासहित ५३ रनको अर्धशतकीय पारी खेले ।

ह्यारी ब्रुकले अविजित ४२, बेन डकेटले २१, डेविड मलानले २० र फिल साल्टले ११ रन बनाए । पाकिस्तानका लागि उस्मान कादिरले दुई तथा शहनवाज दहानी र हरिस रौफले एकरएक विकेट लिए ।

त्यसअघि कराँचीस्थित नेसनल स्टेडियममा टस हारेर ब्याटिङको निम्तो पाएको पाकिस्तानले निर्धारित २० ओभरमा सात विकेट गुमाउँदै १५८ रन बनायो ।

उसका लागि मोहम्मद रिजवानले ४६ बलमा ६ चौका र दुई छक्कासहित ६८ रनको अर्धशतकीय पारी खेले । कप्तान बाबर आजमले ३१, इफ्तिखर अहमदले २८ र हैदर अलीले ११ रन जोडे ।

इंग्ल्याण्डका लागि ल्युक उडले तीन, आदिल राशिदले दुई तथा कप्तान मोइन अली र साम करनले एक/एक विकेट हात पारे ।

यो जितसँगै इंग्ल्याण्डले सात खेलको सिरिजमा १–० को अग्रता लिएको छ । पाकिस्तान–इंग्ल्याण्डको दोस्रो खेल भोलि (बिहीबार) हुनेछ ।