आयोगले दियो निर्वाचन अधिकृतहरूलाई निर्वाचन क्षेत्र नछोड्न निर्देशन

काठमाडौ, निर्वाचन आयोगले मंसिर ४ गते हुने प्रतिनिधिसभा तथा प्रदेशसभा निर्वाचनका लागि असोज १५ देखि २० भित्र निर्वाचन अधिकृतको कार्यालय स्थापना गर्न निर्देशन दिएको छ ।

त्यस्तै निर्वाचन अधिकृतहरूलाई पूर्व सहमति बिना तोकिएको निर्वाचन क्षेत्र नछाड्न पनि विज्ञप्ति मार्फत भनिएको छ ।

‘निर्वाचन अधिकृतले कार्यालय स्थापना गरेपछि आयोगको पूर्व सहमति बिना तोकिएको निर्वाचन क्षेत्र नछाड्न सबै निर्वाचन अधिकृतलाई जानकारी गराउने निर्णय समेत भएको छ’, आयोगले जारी गरेको विज्ञप्तिमा उल्लेख छ ।

यसअघि नै आयोगले सबै जिल्लामा जिल्ला निर्वाचन अधिकृत तोकेको थियो । आयोगका प्रवक्ता शालिग्राम पौडेलले शुक्रबार विज्ञप्ति जारी गर्दै असोज २० गतेभित्र निर्वाचन अधिकृतको कार्यालय स्थापना गर्न सबै जिल्लाका निर्वाचन अधिकृतहरूलाई निर्देशन दिएका छन् ।