मनास्लुमा हिउँ पहिरो-१३ जना बेपत्ता, १० भन्दा बढी घाइते

काठमाडौं। गोरखाको मनास्लु हिमालमा हिउँ पहिरो जाँदा १० जनाभन्दा बढी घाइते भएका छन्। १३ जना बेपत्ता भएका छन्।

चुमनुब्री गाउँपालिका वडा नम्बर १ मनास्लु हिमालमा सोमबार मध्यान्ह १२ बजे हिउँ पहिरो खसेपछि १३ जना सम्पर्कविहीन भएको गोरखाका प्रमुख जिल्ला अधिकारी शंकरहरि आचार्यले बताए।

घाइतेको उद्धारका लागि दुइटा हेलिकप्टर पठाइए पनि मौसम प्रतिकूल हुँदा मनास्लु आधार शिविरतर्फ जान सकेको छैन। तेस्रो र चौथो बेसक्यामको बिचमा पहिरो झरेको बताइएको छ ।

हेलि एभरेस्ट, कैलाश हेलिकप्टर र सिम्रिक एयरका तीन वटा बीथ्रीई हेलिकप्टर गोरखाको उत्तरी गाउँ सामामा उद्धारका लागि काठमाडौँबाट पुगेका छन्।

मनास्लुमा केही दिनदेखि हिउँ पहिरो गइरहेको थियो। गोरखाका प्रमुख जिल्ला अधिकारी शंकरहरि आचार्यले हिउँ पहिरोमा परेकालाई उद्धारका लागि हेलिकप्टर सामागाउँ पुगेको तर मौसम प्रतिकूल भएकोले उद्धार गर्न नसकिएको बताए।