विश्वकप क्रिकेटमा भारतविरुद्ध दक्षिण अफ्रिकाको रोमाञ्चक जीत

एजेन्सी, दक्षिण अफ्रिकाले अस्ट्रेलियामा जारी टी–२० विश्वकप क्रिकेटमा जीत निकालेको छ । आइतबार भएको खेलमा दक्षिण अफ्रिकाले भारतलाई पाँच विकेटले पराजित गरेको हो ।

१३४ रनको सामान्य चुनौती पछ्याउँदै ब्याटिङ गरेको दक्षिण अफ्रिकाले १९.४ ओभरमा पाँच विकेटको क्षतिमा लक्ष्य भेट्टायो । दक्षिण अफ्रिकाले खराब सुरुआत गरे पनि चौथो नम्बरमा ब्याटिङ गर्न आएका ऐडन मारक्रम र पाँचौँ नम्बरमा आएका डेभिड मिलरले उत्कृष्ट प्रदर्शन गर्दै जीत दिलाए ।

२४ रन हुँदा दक्षिण अफ्रिकाले तीन विकेट गुमाएको थियो । तर, मारक्रम र मिलरले ७६ रनको साझेदारी गरे । मिलरले ४६ बलमा तीन चौका र तीन छक्का प्रहार गर्दै ५६ रनमा अविजित रहे । मारक्रमले अर्धशतकसँगै ५२ रन बनाए । बलिङतर्फ भारतका अर्शदिप सिंहले दुई विकेट लिए ।

यसअघि अस्ट्रेलियाको पर्थ रंगशालामा टस जितेर पहिले ब्याटिङ गरेको भारतले निर्धारित २० ओभरमा ९ विकेटको क्षतिमा १३३ रन बनाएको थियो । भारतले ४९ रन बनाउँदा पाँच विकेट गुमाइसकेको थियो ।

कप्तान रोहित शर्मा १५, विराट कोहली १२, केएल राहुल ९, हार्दिक पाण्ड्या दुई र दीपक होडा शून्यमा आउट हुँदा भारत पूरै दबाबमा आएको थियो ।

तर, चौथो नम्बरमा ब्याटिङ गर्न आएका सूर्यकुमार यादव र दिनेश कार्थिकले छैटौँ विकेटका लागि ५२ रनको साँझेदारी गर्दै भारतलाई सम्मानजनक स्कोरमा पुर्‍याए । सूर्यकुमारले ४० बलमा ६८ रन बनाए ।

भारतीय ब्याटरलाई सस्तैमा समेट्ने क्रममा दक्षिण अफ्रिकाका लुनगी निगिडीले चार विकेट लिए । त्यस्तै, वायन पर्नलले तीन विकेट लिए ।

भारतको यो तीन खेलमध्ये पहिलो हार हो । यसअघि भारतले पाकिस्तानलाई चार विकेटले पराजित गरेको थियो । त्यस्तै, दोस्रो खेलमा नेदरल्यान्ड्सलाई ५६ रनले हराएको थियो ।

यता, दक्षिण अफ्रिकाले आफ्नो पहिलो खेलमै वर्षाको कारण जिम्बाब्वेसँग १–१ अंक बाँड्न बाध्य भयो । त्यसपछि आफ्नो दोस्रो खेलमा दक्षिण अफ्रिकाले बंगलादेशलाई १०४ रनले पराजित गरेको थियो ।

यो जीतसँगै समूह दुईमा रहेको दक्षिण अफ्रिका शीर्ष स्थानमा उक्लिएको छ । दक्षिण अफ्रिकाको तीन खेलबाट पाँच अंक भएको छ ।