गाउँमा विकास र घरघरमा रोजगारी बनाउने मुख्य योजना छ : वरिष्ठ नेता पौडेल

तनहुँ, नेपाली कांग्रेसका वरिष्ठ नेता रामचन्द्र पौडेलले गाउँगाउँमा विकास र घरघरमा रोजगारी बनाउने आफ्नो मुख्य योजना रहेको बताएका छन् ।

तनहुँको बन्दीपुर गाउँपालिका–६ साराङ्गघाट तथा आँबुखैरेनी गाउँपालिका–६ मा बिहीबार आयोजित बेग्लाबेग्लै कार्यक्रममा उनले गाउँमा नै बास बसाउन त्यहाँ आवश्यक पूर्वाधार विकास निर्माण बनाउनुपर्नेमा जोड दिए ।

गाउँको विकासमा जोड दिँदै गाउँबाट शहरमा बसाइँसराई हुने प्रवृत्तिलाई निराकरण गर्ने मुख्य लक्ष्य राखेर अघि बढेको उनले बताए ।

सङ्घीय लोकतान्त्रिक गणतन्त्रको रक्षा गर्दै देशमा सुशासन कायम गर्न गठबन्धनको आवश्यकता देखिएको उनको भनाइ थियो ।

‘लोकतन्त्र र संविधान जोगाउन गठबन्धन गरिएको हो,’ पौडेलले भने, ‘कांग्रेसको मात्रै दुई तिहाइको बहुमत आउन नसक्ने देखिएकाले गठबन्धन गरिएको हो ।’