साफ यु -१५ च्याम्पियनसिप लगातार दोस्रो जीतको खोजिमा नेपाल

काठमाडौ, बङ्गलादेशमा जारी चौथो संस्करणको महिला साफ यु-१५ च्याम्पियनसिपमा नेपालले आज घरेलु टोलीको सामना गर्दैछ ।

खेल ढाकास्थित वीर श्रेष्ठ सहिद सिपाही मुस्ताफा कमल स्टेडियममा स्थानीय समयअनुसार दिउँसो ४: ४५ बजे सुरू हुनेछ । दुवै टोली लगातार दोस्रो जीत निकाल्ने लक्ष्यका साथ मैदान उत्रिनेछन् ।

पहिलो खेलमा नेपाल र बंगलादेशले भुटानविरुद्ध क्रमशस् ७-० तथा ८-० को फराकिलो जीत हात पारेका थिए ।

नेपालले साफ यु-१५ मा बंगलादेशलाई हराउन सकेको छैन । नेपाल यसअघिका तीनै भेटमा पराजित भएको छ ।

२०१७ को पहिलो भेटमा नेपालले ६-० को फराकिलो हार बेहोरेको थियो । २०१८ मा पनि नेपाल ३-०ले पराजित हुन पुग्यो ।