डोटी भूकम्पका गम्भीर घाइतेलाई थप उपचारका लागि धनगढी लगियो

सिलगढी, भूकम्पले घर भत्किँदा गम्भीर घाइते हुनुभएका डोटी पूर्वीचौकी गाउँपालिका –३ गैरागाउँका दुई जना महिलालाई थप उपचारका लागि नेपाली सेनाको हेलिकप्टरमार्फत सेती प्रादेशिक अस्पताल धनगढी पठाइएको छ ।

डोटी जिल्ला अस्पतालका अध्यक्ष धनबहादुर नेपालीका अनुसार जिल्ला अस्पताल डोटीमा उपचार हुन नसकेपछि ४२ वर्षीया चन्द्रा बोहरा र ५० वर्षीया बिस्ना बोहरालाई थप उपचारका लागि सेती प्रादेशिक अस्पताल धनगढी पठाइएको हो ।

भूकम्पमा परी घाइते तीन जनाको जिल्ला अस्पताल डोटीमा उपचार भइरहेको छ । खप्तड राष्ट्रिय निकुञ्ज केन्द्र रहेको भूकम्पले डोटीमा घर भत्किँदा ६ जनाको मृत्यु भएको थियो।

पाँच जना घाइते भएका छन् । जिल्ला प्रहरी कार्यालय डोटीका अनुसार मृत्यु हुनेहरूमा ४ जना बालबालिका छन् ।

५० वर्षीय प्रेम बोहरा र उहाँकी छोरी १४ वर्षीया तुलसी बोहरा, ४० वर्षीया भगवती बोहरा, छोरा ८ वर्षीय हर्क बोहरा, १३ वर्षीया छोरी सीता बोहरा र १४ वर्षीया धनसरी बोहरा रहेका छन् ।