फेरि बढ्न थाल्यो खानेतेलको मूल्य

काठमाडौं, दशैंतिहार शुरू भएसँगै खानेतेलको मूल्य केही घटे पनि फेरि बढ्न थालेको छ । रुस–युक्रेन तनावका कारण लगातार बढिरहेको खानेतेलको मूल्य दशैंतिहारमा घटेको थियो । तर, फेरि अहिले आएर बढ्न थालेको हो ।

तिहारयता खानेतेलको मूल्य प्रतिलिटर ५० रुपैयाँसम्मले बढिसकेको पाइएको छ । हरेक ब्रान्डको खानेतेलको खुद्रा मूल्य तिहारयता लिटरमा २० देखि ५० रुपैयाँसम्म बढेको बताइएको छ ।

दशैंको बेला प्रतिलिटर २ सय ४० रुपैयाँमा पाइने सोयाबिन तेललाई अहिले २ सय ८० रुपैयाँसम्म पर्न थालेको छ ।

३ सय २० रुपैयाँ लिटरको तोरीको तेल अहिले ३ सय ४० रुपैयाँसम्म पुगेको छ । त्यसैगरी २ सय ५० रुपैयाँ लिटर पर्ने सनफ्लावर तेलको मूल्य हाल ३ सय रुपैयाँसम्म पुगेको छ ।

केही समय तेलको मूल्य अझै बढ्न सक्ने उद्योगी बताउँछन् ।