अब एमालेमा कुनै गुटबन्दी छैन : अध्यक्ष ओली

चितवन, नेकपा एमालेका अध्यक्ष एवं पूर्वप्रधानमन्त्री केपी ओलीले स्थिर सरकारका लागि आगामी निर्वाचनमा नेकपा एमालेले जित्नुपर्ने बताएका छन् ।

एमाले चितवनले सोमबार आयोजना गरेको चुनावी सभालाई सम्बोधन गर्दै उनले विगतमा स्थिर सरकार बन्न नसकेको भन्दै अब स्थिर सरकारका लागि एमालेलाई मतदान गर्नुपर्ने बताए ।

‘जोसँग भिजन, मिसन, नीति, कार्यक्रम योजना छ, त्यो सरकारमा जानुपर्छ,’ जनतालाई कसरी सुखी र खुशी बनाउने, देशलाई सम्बृद्ध कसरी बनाउने त्यो ठाउँमा कसरी पुग्ने भन्ने एमालेको उद्देश्य रहेको भन्दै उनले थपे, ‘जोसँग नीति छ त्यस्ले स्थिर सरकार बनाउँदै नीति कार्यान्वयन गर्न समय पाउनुपर्छ ।’

सामाजिक न्याय र समानतासहितको सम्वृद्धि नै समाजवाद भएको भन्दै उनले त्यसको प्राप्तिका निम्ति एक ढिक्का भएर अगाडि बढ्नुपर्ने बताए ।

‘अब पार्टीमा गुटबन्दी छैन, पार्टी एक ढिक्का छ । यो सत्य र तथ्यलाई मनन गरेर अघि बढ्नुस्,’ ओलीले भने । उनले एमालेको सरकार एमालेका लागि नभइ आम जनताको खुसीका लागि भएको पनि बताए ।