१:३० बजेसम्म देशभर ४६ प्रतिशत मतदान, मतपेटिका ढुवानीका लागि सवारीसाधन तैनाथ

काठमाडौं, गृहसचिव विनोदप्रकाश सिंहले हालसम्म देशभर ४६ प्रतिशतसम्म मतदान सम्पन्न भएको बताएका छन् ।

आइतबार दिउँसो काठमाडौं उपत्यकाका काठमाडौं, भक्तपुर, ललितपुरका विभिन्न मतदान स्थलको अवलोकन गर्दै उनले देशभर ४६ प्रतिशतसम्म मतदान सम्पन्न भएको बताएको जानकारी पाएको बताएका हुन् ।

उनले अहिलेसम्म शान्तिपूर्ण र व्यवस्थित रुपमा मतदान भइरहेको पाएको बताए । सिंहले मतदान कार्य रोकिएका ठाउँमा पनि मतदान पुनः सुचारु गराउन पहल गरिरहेको र कतिपय स्थानमा पुनः सुचारु भइसकेको बताए ।

गृहसचिव सिंहले निर्वाचन सामग्री, निर्वाचन कर्मचारी, मतदाताहरू र उम्मेदवारलाई कुनै पनि किसिमको भौतिक क्षति अहिलेसम्म नपुगेको बताए ।

उनले मतपेटिका ढुवानीका लागि आवश्यकताअनुसारका सवारीसाधन तैनाथ राखिएको पनि बताए ।

‘शान्तिपूर्ण र व्यवस्थित रुपमा मतदान भइरहेको हामीले पाइरहेका छौँ । मतदान कार्य रोकिएका ठाउँमा पनि मतदान पुनः सुचारु गराउन हामीले व्यवस्था गरिरहेका छौँ ।

निर्वाचन सामग्री, निर्वाचन कर्मचारी र मतदाताहरू र उम्मेदवारलाई कुनै पनि किसिमको भौतिक हामी पुगेको छैन,’ सिंहले भने, ‘हामीले सुरक्षा व्यवस्था कडा बनाएका छौँ ।

४६ प्रतिशतसम्म मतदान भएको भन्ने जानकारी आएको छ । मतपेटिका ढुवानीका लागि आवश्यकताअनुसारका सवारीसाधन तैनाथ राखिएको छ ।’

उनीसहितको प्रमुख सुरक्षा अधिकारीको टोलीले काठमाडौं, भक्तपुर र ललितपुरका विभिन्न मतदान केन्द्रहरूको स्थलगत अवलोकन गरेको थियो ।

निरीक्षणका क्रममा मतदान स्थलमा मतदाताले उत्साहित तवरबाट मतदान गरिरहेको पाएको गृहसचिव सिंहले जानकारी दिए ।