विश्वकप फुटबलमा बराबरीमा रोकिए इंग्ल्याण्ड र अमेरिका

एजेन्सी, कतारमा जारी फिफा विश्वकप अन्तर्गत गएराति सम्पन्न खेलमा इंग्ल्याण्ड र अमेरिकाले गोलरहित बराबरी खेलेका छन् ।

अल बायत स्टेडियममा भएको समूह ‘बी’ को खेलमा दुवै टोलीले पाएका केही अवसरलाई सदुपयोग गर्न नसक्दा अंक बाँड्न बाध्य बने ।

खेलको नवौं मिनेटमा रहिम स्टर्लिङको कटब्याकमा ह्यारी केनको प्रहारलाई अमेरिकी डिफेन्डर टिम रिमले विफल पारे ।

२६ अ‍ौं मिनेटमा टिम वेहको क्रसमा वेस्टन मक्केनीको भली पोस्टभन्दा थोरै माथिबाट जाँदा अमेरिका अग्रता लिनबाट चुक्यो ।

३२ अ‍ौं मिनेटमा अमेरिकाका क्रिस्टियन पुलिसिचको प्रहार क्रसबारमा लागेर बाहिरियो । ४५ अ‍ौं मिनेटमा लुक शाको कटब्याकलाई बुकायो साकाले पोस्टको दिशा दिन सकेनन् ।

लगत्तै मेसन माउन्टको प्रहारलाई अमेरिकी गोलरक्षक म्याट टर्नरले बचाउ गरे । यो नतिजासँगै इंग्ल्याण्डले दुई खेलबाट चार अंक जोड्दा अमेरिकाको समान खेलबाट दुई अंक छ ।

त्यस्तै, समूह ‘ए’ अन्तर्गत भएको खेलमा नेदरल्याड्ण्सले इक्वेडरले १–१ को बराबरी खेलेका छन् । खलिफा अन्तर्राष्ट्रिय रंगशालामा खेलको छैटौं मिनेटमै कोडी गाक्पोको गोलमार्फत डच टोलीले सुरुवाती अग्रता लिएको थियो ।

४९ औं मिनेटमा इक्वेडरका इनर भ्यालेन्सियाले गोल गरेपछि खेल १–१ को बराबरीमा सकियो । यो नतिजासँगै दुवै टोलीले दुई खेलबाट समान चार अंक जोडेका छन् ।