२०८० चैत्र १५
March 28, 2024, Thursday

‘प्रचण्डको विगतको चरित्र बुझेर ‘ट्रयाक टु’ का लागि तयार रहनुपर्थ्यो, हामी चुक्यौँ’ डा. नारायण खड्का (अन्तरवार्ता)

‘प्रचण्डको विगतको चरित्र बुझेर ‘ट्रयाक टु’ का लागि तयार रहनुपर्थ्यो, हामी चुक्यौँ’ डा. नारायण खड्का (अन्तरवार्ता)

नेपाली कांग्रेसका नेता तथा निवर्तमान परराष्ट्रमन्त्री डा. नारायण खड्काले नयाँ सरकारलाई धेरै उग्र नहुन र राजनीतिक सिद्धान्तका आधारमा नबहकिन सुझाव दिएका छन् ।

परराष्ट्र नीतिमा धेरै ठूलो कुरा गरेर बस्न थाल्यौं भने ‘हातमा लाग्यो शून्य’ हुने उनको भनाइ छ । उपप्रधान तथा गृहमन्त्री गृहमन्त्री रवि लामिछाने भारतसँग पहिलेजस्तै बोल्ने हिम्मत राख्नुहुन्छ ? भन्दै खड्काले प्रश्न गरे ।

यस्तै विगतका परराष्ट्रमन्त्रीको भन्दा आफूले राम्रो काम गरेको उनको दाबी छ । खड्काले प्रचण्डमा नैतिक ह्रास आउँदा गठबन्धन भत्किएको पनि बताए । एमाले अध्यक्ष केपी शर्मा ओलीको रणनीति सफल हुँदा कांग्रेस सभापति शेरबहादुर देउवा पार्टीमा रक्षात्मक हुन पुगेको उनको बुझाइ छ ।

गठबन्धन भत्किनुका पछाडिको कारणबारे सभापति शेरबहादुर देउवाले केन्द्रीय कार्यसमितिमा जवाफ दिनुपर्ने खड्काले बताए । समसामयिक राजनीतिक घटना, परराष्ट्र नीतिका विषयमा निवर्तमान परराष्ट्रमन्त्री खड्कासँग गरिएको कुराकानीको सम्पादित अंश –

गठबन्धन भत्किँदा आम निर्वाचनबाट पहिलो पार्टी बनेको कांग्रेस केन्द्रदेखि प्रदेससम्म प्रतिपक्षमा बस्नुपर्ने अवस्था आएको छ । यो परिघटनालाई कसरी हेर्नुभएको छ ?

हाम्रो पार्टी सभापति नेतृत्वको गठबन्धनले स्थानीय तह, प्रदेश र प्रतिनिधिसभा निर्वाचन शान्तिपूर्ण रुपमा सम्पन्न ग¥यो । नेपाली कांग्रेस ८९ सिट प्राप्त गरेर पहिलो पार्टी बन्यो । निर्वाचनमा पाँच दलीय गठबन्धनले करिब बहुमत प्राप्त गरेको थियो । गठबन्धनकै सरकार बन्ने अवस्था हुँदा हुँदै प्रचण्डजी एमालेसहितको गठबन्धन बनाएर सरकारमा जानुभयो ।

प्रचण्डलाई चुनावपछिको प्रधानमन्त्री दिने कुरा गर्नु भएको थियो भने त्यो दिनुपर्थ्यो । तर निर्णय गर्ने मान्छेका हातमा अनेक सूचना हुन्छ । ती सूचनाको विश्लेषणको आधारमा थप निर्णय गरिन्छ ।

कुन कुन सूचनाको आधारमा पार्टी सभापतिले प्रधानमन्त्री छाड्ने निर्णय गर्न सक्नु भएन ? त्यो उहाँले प्रस्ट पार्नुहोला । तर गठबन्धन जोगाउन नसक्दा आघात भयो । हामीले हाम्रै हातबाट सत्ता फुत्कायौं । बीचको दुर्घटना हुन्थ्यो भने त त्यति महत्व हुन्थेन । तर यसमा धेरै पदहरु जोडिएर आएका थिए । पार्टीका साथीहरुमा खुसीयालीको तरंग आएको थियो । ठूलो अवसरका कुरा थिए । त्यो गुमेपछि पार्टीमा निराशा र आक्रोश देखिएको छ ।

पार्टी सभापतिले सामूहिक छलफल गर्न नचाहँदा दुर्घटना निम्तिएको भन्ने छ । तपाई सभापतिको विश्वास पात्रमध्ये एक हुनुहुन्छ । खास भएको के हो ?

छलफलमा जति जना साथीहरु राखे पनि सभापतिले आफूलाई आएको सूचना अनुसार निर्णय लिनुहुन्थ्यो होला । ठूलो पार्टीका नेताले नैतिक र राजनीतिक रुपमा पहिलो चरणको नेतृत्व कांग्रेसले गर्नपर्छ भन्ने उहाँमा दृढता भयो होला । त्यसमा थेरै साथीहरु थपिएर परिवर्तन हुन्थ्यो भन्ने कुरा म भन्न सक्दिनँ ।

प्रचण्डजीलाई पहिलो चरणमा छाड्नुपर्छ भन्ने साथीहरु छलफलमा नभएको होइन । त्यसमा एक दुई जना थपिएर केही हुनेवाला थिएन । उहाँले सूचना र विश्वासको आधारमा निर्णय गर्नुभयो । त्यो निर्णयले बुम¥याङ गर्यो ।

यसमा देउवा मात्र दोषी देख्नुहुन्छ ? गठबन्धन भत्किएर आफैले प्रतिगामी भनेर दुत्कारेको मान्छेको सहयोगमा प्रधानमन्त्री बन्ने प्रचण्डको निर्णयलाई कसरी हेर्नुहुन्छ ?

केपी ओलीजीको सहयोगमा प्रधानमन्त्री बन्नु प्रचण्डजीको नैतिक ह्रास हो । उहाँले बचे–खुचेको नैतिकता गुमाउनु भएको छ । कांग्रेससँग गठबन्धन गरेर, कांग्रेसकै भोट लिएर अन्तिममा एमालेसँग मिल्न जानुले उहाँमा नैतिक आधार रहेनछ भन्ने देखिन्छ । उहाँको विगतको चरित्र, आनीबानी र लिन सक्ने कदमबारे सोचेर हामी ‘ट्रयाक टु’का लागि तयार भइरहनुपर्थ्यो । त्यहाँ चुक्यौं जस्तो लाग्छ ।

गठबन्धन भत्किएपछि सभापतिसँग संवाद गर्नुभयो ? अहिले देउवाको बुझाई के छ ?

मैले सोमबार भेटेँ । ठूलो दल भएको नाताले प्रधानमन्त्रीको अडान राखेको उहाँको बुझाइ थियो । मैले प्रधानमन्त्रीमा दाबा नगरेको भए संसदको ठूलो पार्टीलाई प्रचण्डसँग बुझायो भनिहाल्थे । आफूले किन दाबा नगरेको भनेर भन्थे ? मैले त्यही भएर दाबा गरेको हुँ भन्ने उहाँको भनाइ छ ।

गठबन्धनलाई यहाँसम्म हामीले नै ल्याएकाले अगाडि पनि हामीले नै लैजानुपर्ने जिम्मेवारी थियो । आफूले त्यो हिसाबले हेरेको उहाँको भनाइ थियो । सभापतिज्यूका अनुसार आलोचना गर्नेहरुले त कांग्रेसले प्रधानमन्त्री पाए पनि भनिहाल्थे, हामीले प्रचण्डलाई दिएको भए पनि आलोचना गरिहाल्थे । मैले जे गरे पनि भन्नलाई छाड्दैन थिए, तथापि मैले सोची, विचारी ठूलो पार्टीका नेताले दाबा गरेको थिएँ । बहुमत नआउँदाको सधैंको परम्परा पनि त्यही छ भन्ने कुरा गर्नुभयो ।

ठूलो पार्टीले २०५१, २०६४, २०७४ मा पनि पहिलो दलले नै सरकारको दावा गरेको थियो । अर्कातिर संवादको अन्तिम घडी पनि बाँकी नै थियो । तर त्यहीबीचमा प्रचण्डजीले एमालेसँग कुरा मिलाइसकेको रैछ भन्ने कुरा गर्नुभयो ।

माओवादी र एमालेबीच सहकार्य भयो । कांग्रेस र एमालेबीच पनि सहकार्य हुन्थ्यो होला । कांग्रेसले माओवादीको विकल्प खोजेको भए पनि सबै गुमाउनुपर्ने अवस्था आउने थिएन । यसमा पनि कांग्रेस किन चुक्यो ?

ओलीजीको रणनीति नै गठबन्धन भत्काउने थियो । प्रचण्डजीलाई साथमा लिएर माधव नेपालजीलाई साइजमा ल्याउने ओलीजीको ठूलो स्ट्राटेजी थियो । उहाँको पहिलो च्वाइस् हामीभन्दा प्रचण्ड थिए । हामीलाई त बाहिरबाट समर्थन गर्ने कुरा मात्र थियो । दुई ठूलो पार्टी मिलेर सरकार बनाउँदा कत्तिको लोकतान्त्रिक हुन्छ भन्ने पनि होला ।

केपी ओलीको स्ट्राटेजी सफल भयो ? ओलीसामु तपाईहरु हार्नुभयो होइन त ?

रणनीतिक रुपमा हामी असफल भयौं । यसले पार्टीमा साथीहरु निराश हुनुहुन्छ । आफ्नै हातमा भएको मौका गुमायौं । अरुले दिने मौका हामीले लिन नसकेको होइन कि हाम्रै हातमा भएको गुमाउँदा साथीहरुले पीडाबोध भएको छ । यसलाई गुटका हिसाबले लिँदा पार्टीमा एकता हुनसक्दैन । पार्टीमा अराजकता निम्तिन्छ । ड्यामेज भइसकेपछि अब सबैले ड्यामेज कन्ट्रोल गर्नतिर लाग्नुपर्छ । पार्टीका जिम्मेवार साथीहरुको काम पनि यही हो ।

पार्टीभित्र यो घटनाको नेतृत्वले नैतिक जिम्मेवारी लिएर सभापति देउवा बिदा हुनुपर्छ भन्ने आवाज सुनिएको छ, तपाई के भन्नुहुन्छ ?

पार्टीभित्र विगतमा पनि यस्ता घटना हुँदा राजीनामा दिनुपर्छ भन्ने आवाज उठ्ने गर्थ्यो । यस्ता कुरा पार्टीका फोरममा गर्नुपर्छ । बाहिर कुर्लिएर तमासा देखाउनु हुँदैन ।

कांग्रेसलाई पहिलो पार्टी बनाएर जस लिनेबेला गठबन्धन भत्किएपछि देउवामाथि अपजसको भारी आइलागेको छ । अब उहाँ पार्टीभित्र रक्षात्मक बनेको अवस्था छ । अब कांग्रेस कसरी अगाडि बढ्छ ?

केन्द्रीय कार्यसमितिमा सभापतिले गठबन्धन भत्किनुको कारण भन्नुपर्छ । सबै कुरालाई क्रमिक रुपमा यो परिस्थिति आयो, मैले यो कारणले अगाडि बढेँ भनेर आफूलाई जस्टिफाइ गर्ने तरिकाले जानुपर्छ । उहाँसँग ०५१ सालदेखि नै गठबन्धनको नेतृत्व सम्हालेको अनुभव थियो । गठबन्धनका दलका नेतासँग खेलिखाएर हिँडेकाले आनीबानी थाहा थियो । उहाँले मजाले गठबन्धनलाई अगाडि बढाउनुहुन्छ भन्ने हामीलाई लागेको थियो । चाँडोभन्दा चाँडो सरकार हातमा लिनुपर्यो ।

त्यो सम्भव छ र ?

नेपालमा सबै कुरा सम्भव छ । नेकपाको दुई तिहाइको सरकार हुँदा कांग्रेस सरकारमा जान्छ भन्ने कुरालाई सम्भव ठान्नु भएको थिएन । हामीसँग ६३ जना मात्र सांसद थिए । त्यो बेला पनि पार्टीलाई सरकारमा पुर्याउनु भयो । नेपालमा हरेक खेल भइरहन्छन् । खेल खेल्नु प¥यो ।

कांग्रेसमा तपाई अन्तर्राष्ट्रिय गतिविधिलाई नजिकबाट बुझेको नेता हो । नयाँ सत्ता समीकरण बन्नुका पछाडि बाह्य चलखेल थियो कि देशभित्र कै चलखेलले सम्भव भयो  ?

हामीले हरेक कुरालाई बाहिरी आँखाले हेर्दा आन्तरिक राजनीतिको चुरो बुझिँदैन क्या । आन्तरिक राजनीतिको चुरो बुझेपछि मात्र फराकिलो ढंगले हेर्नुपर्छ । तपाईले भूराजनीतिक कुरा गर्नुभयो । हाम्रो गाउँको सामान्य उदाहरणबाट यसको पुष्टि हुन्छ । जस्तो ऊ त्यो पल्लो घरमा झगडा भयो भने म एकछिन सुन्छु । निकै हल्लाखल्ला भएपछि म अलि परै पुग्छु । चिनजानको मान्छे हो भने आफूलाई केही असर भइहाल्छ कि भनेर घरभित्रै गएर कुरा गर्छु । बुढाबुढी वा छिमेकीको झगडा हो भने मिलेर बस्नुपर्छ भनेर मिलाउँछु । त्यसैको वृहतररुप हो क्या भूराजनीति भनेको । छिमेकी राष्ट्रले सिधै हस्तक्षेप गरेर यो गर, त्यो गर भनेर भन्ने कुरा हुँदैन ।

तपाईले करिब १५ महिना परराष्ट्र मन्त्रालयको नेतृत्व गर्नुभयो । अनुभव र उपलब्धि के रह्यो ?

परराष्ट्र मन्त्रालयको काम तत्काल देखिनेखालको हुँदैन । भौतिक मन्त्रीले मैले यति सडक बनाए भन्छ । ऊर्जा मन्त्रीले यति मेघावाट तयार भयो भन्छ । खानेपानी मन्त्रीले यति मान्छेलाई खानेपानी वितरण गरियो भन्छ । परराष्ट्रमा त्यस्तो हुँदैन । परराष्ट्र मन्त्रालयको काम देखिने होइन, महसुस गर्ने विषय हो । नेपालको प्रतिष्ठा बढायो, हाम्रो समस्या समाधान हुँदै गयो, मित्र राष्ट्रले पनि हामीलाई सुन्न थाले भन्ने खालको अनुभूति दिलाउने हो ।

मन्त्री नहुँदा तपाई मिडिया फ्रेण्डली हुनुहुन्छ । तर मन्त्री भएपछि मिडियाबाट भाग्नुको कारण के थियो ?

परराष्ट्रमन्त्री हुँदा म एकदमै कम बोलेँ । मन्त्री हुँदा केही पनि इन्फर्मेसन नदिने भनेर कतिपय मिडियाका साथीहरु रिसाएका पनि छन् । इन्फर्मेसन ग्याप नहोस् भनेर मन्त्रालयका प्रवक्तामार्फत महिनाको १ र १५ तारिख प्रेसमिट गर्ने व्यवस्था गरेको थिएँ ।

मसँग प्रत्यक्ष कुरा गर्न नपाए पनि सूचना पाउनु भएको थियो । अन्तर्राष्ट्रिय मामिलामा बोल्दा बढो समवेदनशील भएर बोल्नुपर्छ । मैले एउटा बोल्छु, मिडियामा अर्कै समाचार आइदिन्छ । एमसीसी र लिपुलेकका विषयमा मैले नबोलेकै कुरालाई अतिरञ्जित गरियो ।

विगतको सरकारले निलो नम्बर प्लेट र झण्डा हल्लाएर कालोबाजारी गरेको आरोपमा अवैतनिक दूतको सुविधा रोक्का गरेको थियो । तर तपाईले अवैतनिक दूतलाई सुविधा दिएर व्यापारीसँग नजिक हुन खोजेको आरोप लाग्यो । ५३ देशका अवैतनिक दूतलाई सुविधा दिने निर्णय गर्नुको बाध्यता के थियो ?

यस विषयमा पूर्वाग्रही ढंगले समाचार आएको हो । अवैतनिक दूतलाई निलो नम्बर प्लेट र विमानस्थलको पास दिने कुराको मैले सुरुवात गरेको होइन । त्यो सहाना प्रधानले सुरु गर्नु भएको हो ।

एक जना अवैतनिक दूतले कोभिडको भ्याक्सिन गाडीमा लुकाएपछि त्यस्तो सुविधा रोकिएको थियो । धेरै आएर मलाई हाम्रा राजदूत आउनुहुन्छ, भीआइपी आउनुहुन्छ, हामीले उनीहरुलाई कहाँ भेट्ने ? बाहिर पठाएर कुन गाडीमा चढाइदिने ? हामीले रिसिभ गर्न नपाउने कुरा राम्रो भएन । हाम्रो देशको भीआइपी आउँदा रिसिभ गर्न नपाउँदा हामीलाई उसले के भन्ला ? हामीलाई यति सुविधा दिनु प¥यो भनेपछि सुविधा दिने निर्णय भएको हो । उनीहरुको राष्ट्रिय दिवसमा पनि त्यो सुविधा दिइएको हो । एक जना पत्रकार साथीको अफगानिस्तान जाने टोलीमा नाम थियो । उहाँको नाम काटियो । मैले काटेको पनि होइन । त्यसपछि उहाँले मेरो बारेमा सतही कुरा लेख्न थाल्नुभयो । यस्तै एक जनाले आफ्नो श्रीमतीलाई परराष्ट्र मन्त्रालयमा जागिर लगाइदिनु भन्नु भएको थियो । मैले सकिनँ । त्यसपछि उसले पूर्वाग्रही भएर समाचार बनाउन थाल्यो ।

परराष्ट्रमन्त्री भएर तपाईले अपेक्षित काम गर्न नसकेको कांग्रेसभित्र कै परराष्ट्रका जानकारहरुले भनेको सुनिन्थ्यो । परराष्ट्र मन्त्रालयमा तपाई किन जम्न सक्नु भएन ?

कांग्रेस र कुन जानकार हुन् ? यहाँ सबै आग्रह–पूर्वाग्रह राखेर बोल्नुहुन्छ ।  मेरो कामबारे परराष्ट्रविद र परराष्ट्र मन्त्रालयका कर्मचारीलाई सोध्नु भए हुन्छ । मैले जुन किसिमको सन्तुलन कायम गरेको छु, जुन किसिमको नयाँ काम गरेको छु यसअघिका कुनै पनि परराष्ट्रमन्त्रीले गर्न सकेका थिएनन् ।

पाकिस्तान र अफगानस्तानमा मानवीय सहयोग र चीनसँगको सम्बन्ध सुधारको काम भएको छ । अन्तर्राष्ट्रिय फोरममा मैले बोलेको कुराले विश्वको ध्यान तानेको थियो । परराष्ट्र मन्त्रालयलाई एउटा हाइटमा पुर्याउने काम भएको छ । मेरो कामको युएनबाट प्रशंसा भएको छ ।

लामो समयदेखि सार्क सम्मेलन हुन सकेको छैन । भारत र पाकिस्तानको तनावले सार्कको अस्तित्व एकपछि अर्को गरी संकटमा फस्दै छ । सार्कबारे तपाई सम्मिलित सरकारले पनि केही काम गर्न सकेको देखिएन नि ?

नेपाल, बंगलादेश, श्रीलंका लगायतको प्रयासले मात्र सार्क सम्मेलन हुने कुरा सम्भव थिएन । जतिसुकै खर्राट मान्छे परराष्ट्रमन्त्री वा प्रधानमन्त्री भए पनि सार्कको समस्या सुल्झाउन सकिने अवस्था छैन ।

भारत र पाकिस्तानको मुद्दामा हामीले मध्यस्थता गर्न सक्ने अवस्था थिएन । भारतलाई सम्झाएर सार्क अगाडि बढाउने भन्ने खालको कुटनीतिक दक्षता प्राप्त गर्न हामीलाई निकै नै संघर्ष गर्नुपर्ने हुन्छ । हामीले मात्र होइन, अन्य देशले पनि भारत र पाकिस्तानको सम्बन्धन समधुर होस् भन्ने छ । तर अहिलेसम्म त्यो भएको छैन । ठूलो फड्को मार्नका लागि परराष्ट्रमन्त्री एक्लैले गरेर मात्र हुँदैन । देशको पुरै परिस्थिति चेन्ज हुँदा मात्र काम गर्न सकिन्छ । मुलुकको अवस्था गज्याङ–मज्याङ भइरहेका बेला परराष्ट्र नीति पनि त्यस्तै हुन्छ ।

सीमा समस्या समधान गर्ने विषयमा तपाईको तदारुकता देखिएन । सम्बन्धित पक्षले नसुनेको हो या तपाई उदासिन बन्नु भएको हो ?

प्रधानमन्त्रीजी भारत जानुभयो । भारतका प्रधानमन्त्री मोदीजी लुम्बिनी आउनुभयो । हामीले त्यहाँ सीमाको विषय नउठाएको होइन । यसलाई पछि छलफल गर्छु । कुटनीति संयन्त्रमार्फत कुरा गरौँला भन्ने कुरा भए ।

वार्ताको टेबलमा बस्नुअघि घरेलु अवस्था मजबुत बनाउनुपर्ने अवस्था छ क्या । घरमा आर्थिक वा अन्य रुपमा परनिर्भर हुँदा ठूलो उपलब्धि गर्न गाह्रो हुन्छ । तथापि विगतमा बिग्रिएको कुरालाई स्टेप टू स्टेप सुधारेर जानुपर्छ । राष्ट्रिय हितलाई पूरा गर्ने क्रममा हामीले कुनै कसर बाँकी राखेका छैनौं ।

परराष्ट्रका सन्दर्भमा नयाँ सरकारलाई तपाईको सुझाव के छ ?

धेरै उत्ताउलो, उग्रता नदेखाउन र राजनीतिक सिद्धान्तका आधारमा नबहकिन मेरो सुझाव छ । गठबन्धनमा रहेको एउटा पार्टीका अध्यक्ष (राष्ट्रिय स्वतन्त्र पार्टीका अध्यक्ष रवि लामिछाने) ले भारतलाई वार्ता कहाँ गर्ने ? लिम्पियाधुरामा गर्ने कि दिल्लीमा गर्ने ? हामी तयार छौं भनेर भनेँ ।

अहिले ती मन्त्री भएका छन् । अब उनले त्यो हिम्मत राख्छन् कि राख्दैनन् त ? लिम्पियाधुरा र दिल्लीमा वार्ता गर्ने कहिले हो भनेर अब उहाँले भन्नुहुन्छ त ? यस्ता खालको उग्रताले विदेश नीति चल्दैन ।

कुटनीतिक शब्द प्रयोग गरेर विदेश नीतिलाई अगाडि बढाउनुपर्छ । हामी धेरै ठूलो कुरा गरेर बस्न थाल्यौं भने हातमा लाग्यो शून्य हुन्छ । हाम्रो राष्ट्रियता, सार्वभौमता, क्षेत्रीय अखण्डता, अन्तर्राष्ट्रिय सीमाका र भौगोलिक समवेदनशीलतालाई ध्यान दिएर जानुपर्छ । वैदेशिक घाटा न्यून गर्न, विदेशी लगानी ल्याउन र ठूला देशका राष्ट्र प्रमुखको भ्रमण गराउन लाग्नुपर्छ ।

रातोपाटीबाट

Related News

‘सहकारी क्षेत्रमा सुशासनसहितको शुद्धीकरणलाई प्राथमिकता दिएर अगाडि बढ्छौं’
‘सहकारी क्षेत्रमा सुशासनसहितको शुद्धीकरणलाई प्राथमिकता दिएर अगाडि बढ्छौं’
  • २०७९ पुष १४, बिहीबार ११:०७ गते

बचत तथा ऋण सहकारी संस्थाहरूको राष्ट्रिय महासंघ अर्थात् नेफ्स्कुन (नेसनल फेडरेसन अफ सेभिङ एण्ड क्रेडिट को–अपरेटिभ्स अफ नेपाल) को पुस...

वैदेशिक रोजगारीमा पठाईदिन्छु भन्दै ठग्ने घटना बढे
वैदेशिक रोजगारीमा पठाईदिन्छु भन्दै ठग्ने घटना बढे
  • २०७९ पुष १४, बिहीबार ११:०७ गते

पछिल्लो समय अपराधका स्वरूप बदलिन थालेका छन् । अन्य अपराधका घटनाका तुलनामा आर्थिक अपराधको संख्या बढी रहेको प्रहरीको तथ्याङ्क छ...

रामचन्द्र दाइले अघि बढाएका योजना डोर्‍याउन उत्तराधिकारीको रूपमा म आएको छु : गोविन्द भट्टराई
रामचन्द्र दाइले अघि बढाएका योजना डोर्‍याउन उत्तराधिकारीको रूपमा म आएको छु : गोविन्द भट्टराई
  • २०७९ पुष १४, बिहीबार ११:०७ गते

आगामी १० वैशाखमा हुने तनहुँ–१ को उपनिर्वाचनमा ९ जनाको उम्मेदवारी दर्ता भएको छ । उक्त क्षेत्रमा सत्ता गठबन्धनका साझा उम्मेदवारका...

TOP