त्रिभुवन विश्वविद्यालयमा आजदेखि हिउँदे बिदा

काठमाडौ, जाडो बढेपछि त्रिभुवन विश्वविद्यालयले आजदेखि हिउँदे बिदा दिएको छ । त्रिविअन्तर्गतका आङ्गिक र सम्बन्धन प्राप्त क्याम्पसमा हिउँदे बिदा दिइएको हो ।

त्रिवि कार्यकारी परिषद्ले आजदेखि बढीमा २२ दिन हिउँदे बिदा गर्ने निर्णय गरेको त्रिविका सूचना तथा जनसम्पर्क महाशाखाका प्रमुख योगेन्द्रप्रसाद दाहालले जानकारी दिए ।

उनका अनुसार उक्त समयमा पठनपाठन बन्द भए पनि प्रशासनिक कार्य भने सञ्चालन हुनेछ । हिउँदे बिदाको समयमा तोकिएका परीक्षा भने नियमित सञ्चालन हुनेछन् ।

त्रिविमा ६२ आङ्गिक र १ हजार ४० सम्बन्धन प्राप्त क्याम्पस रहेका छन् ।