लाओसलाई हराउँदै नेपालले जित्यो थ्री नेसन्स कप उपाधि

काठमाडौ, प्रधानमन्त्री थ्री नेसन्स कप फुटबल प्रतियोगिताको उपाधि घरेलु टोली नेपालले जितेको छ ।

शुक्रबार त्रिपुरेश्वरस्थित दशरथ रंगशालामा भएको फाइनलमा लाओसविरुद्ध २–१ को पुनरागमन जीत निकाल्दै उपाधि जितेको हो ।

नेपालको जीतमा आयुष घलान र मनिष डाँगीले एक/एक गोल गरे । खेलमा लाओसले १७ औँ मिनेटमा फोउचाङभोङ साङ्भिले सुरुआती अग्रता लियो ।

पेनाल्टी क्षेत्र बाहिरबाट दिएको पास डिफ्लेक्ट हुँदा डिफेन्स लाइन बिट भएपछि उनले गोल गरेका थिए ।

२२ औँ मिनेटमा आयुष घलानले गोल गर्दै खेललाई १–१ को बराबरीमा ल्याए । खेलको ८७औँ मिनेटमा मनिषले निर्णायक गोल गर्दै नेपाललाई २–१ को जीत दिलाए ।

नेपालले अपराजित रहँदै उपाधि जित्यो । योसँगै नेपालले ५ हजार अमेरिकी डलर प्राप्त गर्नेछ । उपविजेता लाओसले ३ हजार डलर पाउनेछ ।

प्रतियोगितामा नेपालले पहिलो खेलमा लाओसलाई २–० ले हराएको थियो । दोस्रो खेलमा भने नेपाल भुटानसँग १–१ को बराबरीमा रोकिएको थियो ।