अस्पतालमा गर्भवती महिला मृत्यु प्रकरण : घटनाको छानविन गर्न समिति गठन गर्ने सहमति

सिन्धुली अस्पतालमा गर्भवती महिलाको मृत्यु भएको घटनाको सत्य–तथ्य छानविन गर्न छानविन समिति गठन गर्ने सहमति भएको छ ।

जिल्ला प्रशासन कार्यालय सिन्धुलीमा आज अस्पताल व्यवस्थापन समिति, सरोकारवाला निकाय र पीडित पक्षबीच भएको छलफलमा घटनाको सत्य–तथ्य छानविन गर्न छानविन समिति गठन गरिदिन बागमती प्रदेश स्वास्थ्य मन्त्रालयलाई अनुरोध गर्ने निर्णय भएको हो ।

उक्त समितिले गर्भवती महिलाको मृत्यु भएको घटनाको सबै प्राविधिक पक्षहरु अध्ययन गरी प्रतिवेदन पेश गर्ने सहमति भएको सिन्धुलीका प्रमुख जिल्ला अधिकारी सुनिता नेपालले बताउनुभयो ।

छानविन समितिमा वागमती प्रदेश स्वास्थ्य मन्त्रालयबाट तोकिएको चिकित्सक २ जना, जिल्ला स्वास्थ्य कार्यालयको प्रतिनिधि १ जना र पिडित पक्षबाट आमन्त्रित प्रतिनिधि १ जना रहने सहमति भएको छ ।

सर्वपक्षीय छलफलमा सिन्धुली अस्पताल व्यवस्थापनबाट अस्पतालका आन्तरिक सुधार तथा कार्यरत स्वास्थ्यकर्मीहरूको व्यवहारगत पक्षको सुधार गर्ने सहमति पनि भएको छ ।